7-13(wed) 金唱片

幾個禮拜前呢度過“20000人次”o既時候, 我講過希望o係我今年生日之前可以突破“金唱片銷量”…點知今次比我想像中仲要快, 我仲有個幾月先生日, 但呢度就已經無啦啦瀏覽率衝破25000…我覺得我o既 “唱片公司” (可惜暫時未有) 應該同我搞個記者招待會開香檳慶祝, 再順勢幫我成立一個歌迷會…!


(happy 25010)

好喇! 我發完癲…今次又捕捉唔到, 仲要過o左成10個萍果, 到25010先capture到…依家真係愈o黎愈難去捕捉, 我已經特登“目及”實o架啦, 點知由返到屋企已經跳過o左喇…我諗我以後都係順其自然算吧啦, 真係咁o岩見到先capture啦!

呢個diary由當初o既 “英倫遊記”, 到依家主力報導我最耍家o既娛樂消息, 討論新興及老餅電視劇; 由最初只係用o黎娛樂自己, update朋友, 同埋記低d生活鎖事, 以防日後自己老人癡呆, 唔記得曬d o野, 咁都仲可以叫有d憑證呀…到依家演變成一個“公眾地方”, 每日都有好多同我唔相識o既朋友o黎睇o下, 搞到我好似有d社會責任咁, 唔好意思太亂咁發o翕風…所以我睇番我早期寫o既diary, 係比依家更好笑, d標題亦都精警好多 (又或者係因為當時更有閒情逸緻去用心寫每一篇日記?!)! 原來唔止我自己咁覺得, 有d睇o左呢個diary多年o既朋友都話俾我知我o既style好似轉o左少少, 無o左呢個diary一貫o既尖酸刻薄style…但佢o地個個都係鍾意我一向o既抵死賤格style多d (我自己都係)!

我知道呢半年o黎多o左好多同我互不相識o既朋友定期o黎睇我o既日記…可能因為大家有共同興趣, 又或者有某d地方吸引到大家…我好高興知道有咁多同我志同道合o既朋友, 更高興知道有好多對電視迷比我更瘋狂…可以搵到一班同我discuss 劇情o既朋友, 係最賞心樂事!

想做個小小o既民意調查, 唔知大家係由幾時開始同埋從咩途徑入到o黎呢度呢?! 我知道大部份都係因為search“我本善良”而入o左o黎…唔知又有無係因為其他原因呢?! 如果大家唔介意, 希望可以email話我知!